The Bible Information

చిన్నపిల్లవాడు దేవుణ్ణి సేవించడం

ఈ చిన్నపిల్లవాడు అందంగా కనిపిస్తున్నాడు కదా? ఆయన పేరు సమూయేలు. సమూయేలు తలపై చేతులుంచిన వ్యక్తి ఇశ్రాయేలు ప్రధాన యాజకుడైన ఏలీ. సమూయేలును ఏలీ దగ్గరకు తెచ్చింది తండ్రి ఎల్కానా మరియు తల్లి హన్నా.

సమూయేలు అప్పుడు కేవలం నాలుగు లేక ఐదు సంవత్సరాల వయస్సువాడే. ఇక్కడ యెహోవా మందిరంలోనే ఏలీతోను ఇతర యాజకులతోను ఉండడానికి వచ్చాడు. ఎల్కానా మరియు హన్నా ఇంత చిన్నపిల్లవాడైన సమూయేలును యెహోవా మందిరంలో సేవ చేయడానికి ఎందుకు ఇస్తున్నారు? మనం చూద్దాం.

ఇలా జరగడానికి కొన్ని సంవత్సరాల ముందు హన్నా ఎంతో దుఃఖంతో ఉండేది. దానికి కారణం ఆమెకు సంతానం కలుగకపోవడమే. తనకు ఒక బిడ్డ కావాలని ఆమె ఎంతో కోరుకుంది. అలా ఉండగా ఒకరోజు హన్నా యెహోవా మందిరానికి వచ్చి, ‘యెహోవా నన్ను మరువకుము! నీవు నాకు కుమారుణ్ణి అనుగ్రహిస్తే, అతను తన జీవిత కాలమంతా నీకు సేవ చేయడానికి అతన్ని నీకు సమర్పిస్తాను అని ప్రమాణం చేస్తున్నాను’ అని ప్రార్థించింది.

యెహోవా హన్నా ప్రార్థనకు సమాధానమిచ్చాడు, కొన్ని నెలల తరువాత ఆమెకు సమూయేలు పుట్టాడు. హన్నాకు తన చిన్న బాబు అంటే ఎంతో ఇష్టం, అతను చాలా చిన్నగా ఉన్నప్పుడే ఆమె అతనికి యెహోవా గురించి బోధించడం ప్రారంభించింది. ఆమె తన భర్తతో, ‘సమూయేలు పెద్దవాడై, పాలు విడిచిన వెంటనే, అతను యెహోవాను సేవించడానికి నేను అతనిని మందిరానికి తీసుకువెళ్తాను’ అని చెప్పింది.

హన్నా మరియు ఎల్కానా అలా చేయడాన్నే మనమిక్కడ చిత్రంలో చూస్తున్నాం. సమూయేలు తలిదండ్రులు అతనికి చక్కగా బోధించారు కాబట్టి అతను యెహోవా గుడారంలో ఆయనను సేవించగలుగుతున్నందుకు చాలా సంతోషించాడు. ప్రతి సంవత్సరం హన్నా మరియు ఎల్కానా ఈ ప్రత్యేక గుడారంలో ఆరాధించడానికి, తమ కుమారుణ్ణి చూడడానికి వస్తుండేవారు. హన్నా ప్రతి సంవత్సరం సమూయేలు కోసం చేతులులేని ఒక క్రొత్త చొక్కాను తయారుచేసి తీసుకొనివచ్చేది.

అలా సంవత్సరాలు గడిచే కొలది సమూయేలు యెహోవా మందిరంలోనే సేవ చేస్తూ ఉండేవాడు, ప్రజలూ అలాగే యెహోవా ఆయనను ఎంతగానో ఇష్టపడేవారు. అయితే ప్రధాన యాజకుడైన ఏలీ కుమారులు హొఫ్నీ, ఫీనెహాసు మంచివాళ్ళు కాదు. వాళ్ళు చాలా చెడ్డపనులు చేస్తూ, ఇతరులు కూడా యెహోవాకు అవిధేయత చూపించడానికి కారణమయ్యేవారు. ఏలీ వాళ్ళను యాజకుల స్థానం నుండి తీసివేయాలి, కానీ ఆయన తీసివేయలేదు.

గుడారంలో జరుగుతున్న చెడు కార్యాల కారణంగా సమూయేలు యెహోవాను సేవించడం ఆపుచేయలేదు. యెహోవాను ప్రేమించే వాళ్ళు చాలా తక్కువమంది ఉన్నారు కాబట్టి యెహోవా మానవులతో మాట్లాడి చాలా కాలమయ్యింది. సమూయేలు కొంచెం పెద్దవాడైనప్పుడు ఇలా జరిగింది:

సమూయేలు గుడారంలో నిద్రిస్తున్నప్పుడు ఒక స్వరం ఆయనను నిద్ర లేపింది. అప్పుడు ఆయన, ‘చిత్తము’ అని సమాధానమిచ్చి, లేచి ఏలీ దగ్గరకు పరుగెత్తుకొని వెళ్ళి, ‘మీరు నన్ను పిలిచారు కదా, నేను వచ్చాను’ అన్నాడు.

అయితే ఏలీ, ‘నేను నిన్ను పిలువలేదు. వెళ్ళి పడుకో’ అని చెప్పాడు. కాబట్టి సమూయేలు వెళ్ళి పడుకున్నాడు.

తర్వాత రెండవసారి, ‘సమూయేలు!’ అనే పిలుపు వినపడింది. సమూయేలు మళ్ళీ లేచి ఏలీ దగ్గరకు వెళ్ళి, ‘మీరు నన్ను పిలిచారు కదా, నేను వచ్చాను’ అన్నాడు. కానీ ఏలీ, ‘నా కుమారుడా నేను నిన్ను పిలువలేదు. వెళ్ళి పడుకో’ అన్నాడు. కాబట్టి సమూయేలు వెళ్ళి పడుకున్నాడు.

ఆ స్వరము మూడవసారి ‘సమూయేలూ!’ అని పిలవడం వినపడింది. సమూయేలు మళ్ళీ ఏలీ దగ్గరకు పరుగెత్తాడు. ‘ఇదిగో నేను వచ్చాను, మీరు ఈసారి తప్పకుండా నన్ను పిలిచి ఉంటారు’ అన్నాడు. అయితే అలా పిలుస్తుంది యెహోవాయే అని ఏలీకి అప్పుడు అర్థమయ్యింది. కాబట్టి ఆయన సమూయేలుతో, ‘ఈసారి కూడా వెళ్ళి పడుకో. ఆయన మళ్ళీ పిలిస్తే, “యెహోవా మాట్లాడు నీ సేవకుడు వింటున్నాడు” అని చెప్పు’ అన్నాడు.

యెహోవా మళ్ళీ పిలిచినప్పుడు సమూయేలు అలాగే అన్నాడు. అప్పుడు యెహోవా తాను ఏలీని, ఆయన కుమారులను శిక్షించబోతున్నట్లు సమూయేలుకు చెప్పాడు. తర్వాత హొఫ్నీ, ఫీనెహాసు ఫిలిష్తీయుల యుద్ధంలో మరణించారు. జరిగిన సంగతి తెలియగానే ఏలీ క్రిందపడి మెడవిరిగి చనిపోయాడు. యెహోవా మాట నిజమయ్యింది.

సమూయేలు పెద్దవాడై, ఇశ్రాయేలుకు చివరి న్యాయాధిపతి అయ్యాడు. ఆయన వృద్ధుడైనప్పుడు ప్రజలు ఆయన దగ్గరకు వచ్చి, ‘మాకు ఒక రాజును ఏర్పాటు చెయ్యి’ అని అడిగారు. సమూయేలు అలా చేయడానికి ఇష్టపడలేదు, ఎందుకంటే నిజానికి యెహోవాయే వాళ్ళ రాజు. అయితే యెహోవా ప్రజలమాట వినమని ఆయనకు చెప్పాడు.

1 సమూయేలు 1:1-28; 2:11-36; 4:16-18; 8:4-9.

గొప్ప బలంగల వ్యక్తి

జీవించినవారిలోకెల్లా గొప్ప బలంగల వ్యక్తి ఎవరో మీకు తెలుసా? ఆయన సమ్సోను అనే పేరుగల న్యాయాధిపతి. సమ్సోనుకు యెహోవాయే అంత బలమిచ్చాడు. సమ్సోను పుట్టక ముందే యెహోవా ఆయన తల్లితో, ‘త్వరలో నీకు ఒక కుమారుడు పుడతాడు. ఇశ్రాయేలీయులను ఫిలిష్తీయులనుండి కాపాడడంలో అతను నాయకత్వం వహిస్తాడు’ అని చెప్పాడు.

ఫిలిష్తీయులు కనానులో జీవించిన చెడ్డ ప్రజలు. వాళ్ళకు యుద్ధ యోధులు చాలామంది ఉండేవారు. వాళ్ళు ఇశ్రాయేలీయులను ఎంతో బాధపెట్టేవారు. ఒకసారి సమ్సోను ఫిలిష్తీయులు నివసించే ప్రాంతానికి వెళ్తున్నప్పుడు, దారిలో ఒక పెద్ద సింహం గర్జించుకుంటూ ఆయనపైకి వచ్చింది. అయితే సమ్సోను వట్టి చేతులతోనే ఆ సింహాన్ని చంపేశాడు. ఆయన వందలాదిమంది చెడ్డ ఫిలిష్తీయులను కూడా చంపాడు.

తర్వాత సమ్సోను దెలీలా అనే స్త్రీని ప్రేమించాడు. ఫిలిష్తీయుల నాయకులు, సమ్సోను బలానికి రహస్యమేమిటో కనుక్కొని చెబితే ఒకొక్కరూ 1,100 వెండి నాణెముల చొప్పున ఇస్తామని దెలీలాకు వాగ్దానం చేశారు. దెలీలా ఆ డబ్బంతా కావాలని ఆశపడింది. ఆమె సమ్సోనుకు గాని, దేవుని ప్రజలకు గాని నిజమైన స్నేహితురాలు కాదు. కాబట్టి ఆమె సమ్సోను బలానికి రహస్యమేమిటో చెప్పమని పదే పదే ఆయనను అడిగేది.

చివరకు సమ్సోను తన బలానికి రహస్యమేమిటో దెలీలాకు చెప్పాడు. ‘నా వెంట్రుకలు ఎన్నడూ కత్తిరించబడలేదు, నేను పుట్టినప్పుడే, దేవుడు నన్ను నాజీరు చేయబడినవాడిగా అంటే ఒక ప్రత్యేకమైన సేవకునిగా ఏర్పరచుకున్నాడు. నా వెంట్రుకలను కత్తిరిస్తే నేను నా బలాన్ని కోల్పోతాను’ అని చెప్పాడు.

దెలీలా ఈ సంగతి తెలుసుకోగానే సమ్సోనును తన వడిలో నిద్రపుచ్చి ఆయన వెంట్రుకలను కత్తిరించేందుకు ఒక మనిషిని పిలిపించింది. సమ్సోను నిద్ర లేచేసరికి తన బలాన్ని కోల్పోయాడు. అప్పుడు ఫిలిష్తీయులు వచ్చి ఆయనను బంధించారు. వాళ్ళు ఆయన రెండు కండ్లను పెరికివేసి ఆయనను తమ దాసునిగా చేసుకున్నారు.

ఒకరోజు ఫిలిష్తీయులు తమ దేవుడైన దాగోనును ఆరాధించడానికి గొప్ప విందును ఏర్పాటు చేశారు. అప్పుడు వాళ్ళు సమ్సోనును ఎగతాళి చేయడానికి ఆయనను బందీగృహం నుండి బయటకు తీసుకొచ్చారు. ఈలోగా సమ్సోను వెంట్రుకలు మళ్ళీ పెరిగాయి. సమ్సోను తనను నడిపించుకొని వెళ్తున్న అబ్బాయితో, ‘ఈ భవనపు స్తంభాలను నన్ను పట్టుకోనివ్వు’ అన్నాడు. ఆ తర్వాత సమ్సోను బలం కోసం యెహోవాకు ప్రార్థించి స్తంభాలను పట్టుకున్నాడు. ‘నన్ను ఫిలిష్తీయులతోపాటు చనిపోనివ్వు’ అని ఆయన మొరపెట్టాడు. ఆ విందుకు 3,000 మంది ఫిలిష్తీయులు వచ్చారు. సమ్సోను ఆ స్తంభాలను పట్టుకొని వంగిన వెంటనే ఆ భవనం కూలిపోయి ఆ చెడ్డ ప్రజలందరూ చనిపోయారు.

న్యాయాధిపతులు 13 నుండి 16 అధ్యాయాలు.

యెఫ్తా వాగ్దానం

మీరు ఎప్పుడైనా ఒక వాగ్దానం చేసిన తర్వాత దానిని నిలబెట్టుకోవడం కష్టంగా ఉన్నట్లు భావించారా? ఈ చిత్రంలోని వ్యక్తికి అలాగే జరిగింది, అందుకే ఆయన చాలా దుఃఖిస్తున్నాడు. ఆ వ్యక్తి యెఫ్తా అనే పేరుగల ధైర్యవంతుడైన ఇశ్రాయేలు న్యాయాధిపతి.

యెఫ్తా ఇశ్రాయేలీయులు యెహోవాను ఆరాధించడం మానుకున్న కాలంలో జీవించాడు. ఇశ్రాయేలీయులు మళ్ళీ చెడ్డ పనులు చేయడం ప్రారంభించారు. కాబట్టి వాళ్ళను అమ్మోనీయులు బాధపెట్టేందుకు యెహోవా అనుమతించాడు. అప్పుడు ఇశ్రాయేలీయులు, ‘మేము నీకు వ్యతిరేకముగా పాపము చేశాం. దయచేసి మమ్మల్ని రక్షించు!’ అని యెహోవాకు మొరపెట్టుకున్నారు.

ప్రజలు తాము చేసిన చెడ్డ పనుల విషయంలో బాధపడ్డారు. వాళ్ళు మళ్ళీ యెహోవాను ఆరాధించడం ద్వారా తమ సంతాపాన్ని తెలియజేశారు. కాబట్టి మళ్ళీ యెహోవా వాళ్ళకు సహాయం చేశాడు.

చెడ్డ ప్రజలైన అమ్మోనీయులతో యుద్ధం చేయడానికి ఇశ్రాయేలీయులు యెఫ్తాను ఎన్నుకున్నారు. యుద్ధంలో యెహోవా తనకు సహాయం చేయాలని యెఫ్తా ఎంతగానో కోరుకున్నాడు. కాబట్టి ఆయన యెహోవాకు ఇలా వాగ్దానం చేశాడు: ‘అమ్మోనీయులపై నువ్వు నాకు విజయం చేకూరిస్తే, విజయోత్సాహంతో నేను తిరిగి వెళ్ళినప్పుడు నన్ను కలవడానికి నా ఇంట్లోనుండి వచ్చే మొదటి వ్యక్తిని నేను నీకు అర్పిస్తాను.’

యెహోవా యెఫ్తా వాగ్దానాన్ని అంగీకరించి ఆయన విజయం పొందేలా సహాయం చేశాడు. యెఫ్తా ఇంటికి వెళ్ళినప్పుడు ఆయనను కలవడానికి బయటికి వచ్చిన మొదట వ్యక్తి ఎవరో మీకు తెలుసా? ఆయన ఒక్కగానొక్క కుమార్తే వచ్చింది. ‘నా కుమారీ! నాకు ఎంత దుఃఖాన్ని కలుగజేస్తున్నావు. నేను యెహోవాకు వాగ్దానం చేశాను, దానిని నేను వెనుకకు తీసుకోలేను’ అని యెఫ్తా విలపించాడు.

యెఫ్తా కుమార్తె ఆ వాగ్దానం గురించి విన్నప్పుడు మొదట ఆమె కూడా దుఃఖించింది. ఎందుకంటే ఆమె తన తండ్రిని, స్నేహితులను విడిచి వెళ్ళాలి. ఆమె తన మిగతా జీవితాన్నంతా షిలోహులో యెహోవా మందిరంలో ఆయనకు సేవచేస్తూ గడపాలి. కాబట్టి ఆమె తన తండ్రితో ‘నువ్వు యెహోవాకు వాగ్దానం చేస్తే దాన్ని నిలబెట్టుకోవాలి’ అన్నది.

ఆ విధంగా యెఫ్తా కుమార్తె షిలోహుకు వెళ్ళి తన మిగతా జీవితాన్నంతా యెహోవాను సేవిస్తూ ఆయన మందిరంలోనే గడిపింది. ఇశ్రాయేలు స్త్రీలు సంవత్సరంలో నాలుగు రోజులు ఆమెను దర్శించడానికి వెళ్ళి, ఆమెతో సంతోషంగా సమయం గడిపేవారు. యెఫ్తా కుమార్తె యెహోవాకు చాలా మంచి సేవకురాలు కాబట్టి ప్రజలు ఆమెను ఎంతగానో ప్రేమించారు.

న్యాయాధిపతులు 10:6-18; 11:1-40.

గిద్యోను, అతని 300 మంది పురుషులు

ఇక్కడ ఏమి జరుగుతుందో చూస్తున్నారా? వాళ్ళంతా ఇశ్రాయేలు యుద్ధ యోధులు. క్రిందకు వంగిన పురుషులు నీళ్ళు త్రాగుతున్నారు. వాళ్ళ దగ్గర నిలబడివున్న వ్యక్తి న్యాయాధిపతియైన గిద్యోను. ఆయన వాళ్ళు నీళ్ళు ఎలా త్రాగుతున్నారో గమనిస్తున్నాడు.

ఆ పురుషులు వేర్వేరు పద్ధతుల్లో నీళ్ళు ఎలా త్రాగుతున్నారో గమనించండి. కొంతమంది తమ ముఖాలను నీళ్ళవరకు పెట్టారు. కానీ ఒక వ్యక్తి మాత్రం తన చుట్టూ జరిగేవాటిని గమనించడానికి వీలుగా నీళ్ళను చేతిలోకి తీసుకొని త్రాగుతున్నాడు. అలా చేయడం ప్రాముఖ్యం, ఎందుకంటే నీళ్ళు త్రాగేటప్పుడు తమ చుట్టూ జరుగుతున్నవాటిని గమనించే పురుషులను మాత్రమే ఎన్నుకోమని యెహోవా గిద్యోనుకు చెప్పాడు. మిగతావాళ్ళను ఇంటికి పంపించమని దేవుడు చెప్పాడు. ఎందుకో చూద్దాం.

ఇశ్రాయేలీయులు మళ్ళీ చాలా కష్టాల్లో చిక్కుకున్నారు. దానికి కారణం వాళ్ళు యెహోవాకు విధేయత చూపించకపోవడమే. మిద్యానీయులు వాళ్ళపై ఆధిపత్యం సంపాదించుకొని వాళ్ళను బాధించడం ప్రారంభించారు. కాబట్టి తమకు సహాయం చేయమని ఇశ్రాయేలీయులు యెహోవాకు మొరపెట్టుకున్నారు, యెహోవా వాళ్ళ మొర విన్నాడు.

యెహోవా గిద్యోనుతో సైన్యాన్ని సమకూర్చమని చెప్పినప్పుడు గిద్యోను 32,000 మంది యోధులను సమకూర్చాడు. అయితే ఇశ్రాయేలీయులకు వ్యతిరేకంగా ఉన్న సైన్యంలో 1,35,000 మంది పురుషులు ఉన్నారు. అయినా యెహోవా గిద్యోనుతో ‘నీకు చాలామంది పురుషులున్నారు’ అని అన్నాడు. యెహోవా అలా ఎందుకు అన్నాడు?

ఎందుకంటే ఒకవేళ ఇశ్రాయేలీయులు యుద్ధాన్ని జయిస్తే, వాళ్ళు తమకై తామే జయించామని అనుకోవచ్చు. యుద్ధంలో జయించడానికి తమకు యెహోవా సహాయం అవసరం లేదని వాళ్ళు అనుకోవచ్చు. అందుకే యెహోవా గిద్యోనుతో, ‘యుద్ధం చేయడానికి భయపడే వాళ్ళందరినీ ఇళ్ళకు వెళ్ళమని చెప్పు’ అన్నాడు. గిద్యోను అలా చెప్పినప్పుడు, 22,000 మంది వెళ్ళిపోయారు. అప్పుడు ఆయన దగ్గర 1,35,000 మందితో పోరాడడానికి కేవలం 10,000 మంది మాత్రమే మిగిలారు.

అయితే, వినండి! యెహోవా మళ్ళీ గిద్యోనుతో ‘నీ దగ్గర ఇంకా ఎక్కువమందే ఉన్నారు’ అన్నాడు. కాబట్టి వాళ్ళందరిని నీళ్ళు త్రాగడానికి వాగు దగ్గరకు తీసుకెళ్ళి, నీళ్ళవరకూ ముఖం పెట్టి త్రాగేవారిని ఇంటికి పంపించమని యెహోవా గిద్యోనుకు చెప్పాడు. ‘నీళ్ళు త్రాగుతున్నప్పుడు తమ చుట్టూ జరుగుతున్నవాటిని గమనించే 300 మంది పురుషులతోనే నేను నీకు విజయాన్ని కలుగజేస్తాను’ అని యెహోవా వాగ్దానం చేశాడు.

యుద్ధం చేసే సమయం వచ్చింది. గిద్యోను తన 300 మంది పురుషులను మూడు గుంపులుగా ఏర్పాటు చేశాడు. ఆయన వాళ్ళలో ప్రతి ఒక్కరికి ఒక్కొక్క బూరను, లోపల దివిటీగల ఒక కుండను ఇచ్చాడు. దాదాపు మధ్యరాత్రి అయినప్పుడు వాళ్ళంతా శత్రు సైన్య శిబిరాన్ని చుట్టుముట్టారు. తర్వాత వాళ్ళంతా ఒకేసారి బూరలను ఊది, కుండలను పగులగొట్టి ‘యెహోవా ఖడ్గము, గిద్యోను ఖడ్గము!’ అని కేకలు వేశారు. శత్రు సైనికులు లేచినప్పుడు వాళ్ళు కలవరపడి భయపడ్డారు. వాళ్ళంతా పరుగెత్తడం ప్రారంభించారు. ఇశ్రాయేలీయులు యుద్ధాన్ని జయించారు.

న్యాయాధిపతులు 6 నుండి 8 అధ్యాయాలు.

రూతు, నయోమి

బైబిలులో రూతు అనే పుస్తకం ఉంది. అది ఇశ్రాయేలుకు న్యాయాధిపతులు ఉన్నకాలంలో జీవించిన ఒక కుటుంబం గురించిన కథ. రూతు మోయాబు దేశానికి చెందిన యౌవన స్త్రీ; ఆమె దేవుని జనాంగమైన ఇశ్రాయేలుకు సంబంధించినది కాదు. కానీ రూతు సత్య దేవుడైన యెహోవా గురించి తెలుసుకున్నప్పుడు ఆయనను ఎంతగానో ప్రేమించింది. నయోమి ఒక వృద్ధ స్త్రీ, ఆమె రూతుకు యెహోవా గురించి తెలుసుకోవడానికి సహాయం చేసింది.

నయోమి ఇశ్రాయేలు స్త్రీ. ఇశ్రాయేలులో ఆహార కొరత వచ్చినప్పుడు ఆమె, ఆమె భర్త, ఇద్దరు కుమారులు మోయాబు దేశానికి తరలి వెళ్ళారు. కొద్దికాలం తర్వాత నయోమి భర్త చనిపోయాడు. తర్వాత నయోమి ఇద్దరు కుమారులు మోయాబు దేశానికి చెందిన రూతు, ఓర్పా అనే ఇద్దరు అమ్మాయిలను పెళ్ళి చేసుకున్నారు. దాదాపు 10 సంవత్సరాల తర్వాత నయోమి ఇద్దరు కుమారులూ చనిపోయారు. నయోమికి, ఆ ఇద్దరు అమ్మాయిలకు ఎంత దుఃఖం కలిగిందో! ఆ తర్వాత నయోమి ఏమి చేసింది?

ఒకరోజు నయోమి మళ్ళీ తన స్వంత ప్రజల దగ్గరకు, తన స్వదేశానికి వెళ్ళిపోవాలని నిర్ణయించుకుంది. రూతు, ఓర్పా ఆమెతోపాటే ఉండాలనుకొని ఆమెతో బయలుదేరారు. అయితే వాళ్ళు కొంత దూరం ప్రయాణించిన తర్వాత, నయోమి ఆ అమ్మాయిలవైపు తిరిగి, ‘మీరు మీ ఇళ్ళకు వెళ్ళి మీ తల్లుల దగ్గర ఉండండి’అని చెప్పింది.

నయోమి ఆ అమ్మాయిలను ముద్దు పెట్టుకొని వాళ్ళకు వీడ్కోలు చెప్పింది. అప్పుడు వాళ్ళిద్దరూ ఏడ్వడం ప్రారంభించారు, ఎందుకంటే వాళ్ళు నయోమిని ఎంతో ప్రేమించారు. ‘మేము వెళ్ళము! మేము నీతోపాటు నీ ప్రజల దగ్గరకు వస్తాము’ అని వాళ్ళు అన్నారు. కానీ నయోమి వాళ్ళతో ‘నా కుమార్తెలారా, మీరు తిరిగి వెళ్ళండి. మీరు మీ ఇళ్ళలో ఉండడమే మంచిది’అని సమాధానమిచ్చింది. కాబట్టి ఓర్పా తన స్వదేశానికి బయలుదేరి వెళ్ళింది. కానీ రూతు వెళ్ళలేదు.

అప్పుడు నయోమి ఆమెవైపు తిరిగి, ‘ఓర్పా వెళ్ళింది. నువ్వు కూడా ఆమెతోపాటు ఇంటికి వెళ్ళు’అంది. అందుకు రూతు, ‘నేను నిన్ను విడిచి వెళ్ళేలా చేయడానికి ప్రయత్నించవద్దు! నన్ను నీతోనే రానివ్వు. నువ్వు ఎక్కడికి వెళ్తావో నేనూ అక్కడికే వస్తాను. నువ్వు ఎక్కడ ఉంటావో నేనూ అక్కడే ఉంటాను. నీ ప్రజలే నా ప్రజలు. నీ దేవుడే నా దేవుడు. నువ్వు ఎక్కడ మరణిస్తావో నేనూ అక్కడే మరణిస్తాను. నేను నీ దగ్గరే పాతిపెట్టబడతాను’అంది. రూతు అలా అన్నప్పుడు నయోమి ఇంక ఆమెను ఇంటికి పంపించడానికి ప్రయత్నించలేదు.

చివరకు ఆ ఇద్దరు స్త్రీలు ఇశ్రాయేలుకు చేరుకొని అక్కడ నివసించడం ప్రారంభించారు. అది యవలు సమకూర్చే కాలము కాబట్టి రూతు వెంటనే పొలాల్లో పని చేయడం మొదలుపెట్టింది. బోయజు అనే వ్యక్తి ఆమెను తన పొలంలో పరిగె ఏరుకొనేందుకు అనుమతించాడు. బోయజు తల్లి ఎవరో మీకు తెలుసా? ఆమె యెరికో పట్టణానికి చెందిన రాహాబు.

ఒకరోజు బోయజు రూతుతో, ‘నేను నీ గురించి అంతా విన్నాను. నువ్వు నయోమిపట్ల ఎంత దయగా ఉన్నావో విన్నాను. నువ్వు నీ తండ్రిని, తల్లిని, నీ స్వదేశాన్ని విడిచిపెట్టి నీకు తెలియని ప్రజలతో జీవించడానికి వచ్చావని కూడా నాకు తెలుసు. యెహోవా నీకు మేలు కలుగజేయును గాక!’ అన్నాడు.

దానికి రూతు, ‘నా యజమానుడా, మీరు నాపట్ల ఎంతో దయగా ప్రవర్తించారు. మీరు నాతో మంచిగా మాట్లాడి నాకు ఎంతో సంతోషం కలిగించారు’అని అంది. బోయజు రూతును ఎంతో ఇష్టపడ్డాడు. కొద్దికాలం తర్వాత వాళ్ళిద్దరూ పెళ్ళి చేసుకున్నారు. అది నయోమికి ఎంత సంతోషాన్ని కలిగించివుంటుందో కదా! రూతు బోయజులకు మొదటి కుమారుడు ఓబేదు పుట్టినప్పుడు నయోమి ఇంకా సంతోషించింది. తర్వాత ఓబేదు దావీదుకు తాతయ్య అయ్యాడు. దావీదు గురించి మనం తర్వాత చాలా తెలుసుకుంటాం.

బైబిలు పుస్తకమైన రూతు.

ధైర్యంగల ఇద్దరు స్త్రీలు

ఇశ్రాయేలీయులు కష్టాల్లో చిక్కుకున్నప్పుడు యెహోవాకు మొరపెట్టుకున్నారు. వాళ్ళకు సహాయం చేయడానికి ధైర్యంగల నాయకులను ఏర్పాటు చేయడం ద్వారా యెహోవా వాళ్ళ ప్రార్థనలకు సమాధానమిచ్చాడు. ఆ నాయకులను బైబిలు న్యాయాధిపతులు అని పిలుస్తుంది. మొదటి న్యాయాధిపతి యెహోషువ. ఆయన తరువాత వచ్చిన న్యాయాధిపతులలో కొంతమంది పేర్లు ఒత్నీయేలు, ఏహూదు, షమ్గరు. అయితే ఇశ్రాయేలుకు సహాయం చేసినవారిలో దెబోరా, యాయేలు అనే ఇద్దరు స్త్రీలు కూడా ఉన్నారు.

దెబోరా ఒక ప్రవక్త్రిని. యెహోవా ఆమెకు భవిష్యత్తును గురించిన విషయాలు తెలియజేసేవాడు, యెహోవా చెప్పిన దానిని ఆమె ప్రజలకు తెలియజేసేది. దెబోరా ఒక న్యాయాధిపతి కూడా. ఆమె కొండప్రాంతంలో ఒక ఈత చెట్టు క్రింద కూర్చొని ఉండేది. ప్రజలు తమ సమస్యలను పరిష్కరించుకోవడానికి సహాయం కోసం ఆమె దగ్గరకు వచ్చేవారు.

ఆ సమయంలో కనానును యాబీను రాజు పరిపాలించేవాడు. అతనికి 900 యుద్ధ రథాలు ఉండేవి. యాబీను సైన్యం ఎంతో బలమైనది కాబట్టి అతను చాలామంది ఇశ్రాయేలీయులను బలవంతంగా దాసులుగా చేసుకున్నాడు. యాబీను రాజు సైన్యాధిపతి పేరు సీసెరా.

ఒకరోజు దెబోరా న్యాయాధిపతియైన బారాకును పిలిపించి, ‘ “నువ్వు 10,000 మందిని తీసుకొని తాబోరు కొండ దగ్గరకు వెళ్ళు. నేను అక్కడ నీ దగ్గరకు సీసెరాను రప్పిస్తాను. అతనిపై అతని సైన్యంపై నేను నీకు విజయం కలుగజేస్తాను” అని యెహోవా చెప్పాడు’ అని తెలియజేసింది.

బారాకు దెబోరాతో, ‘నువ్వు కూడా నాతో వస్తే నేను వెళ్తాను’ అన్నాడు. దెబోరా బారాకుతో వెళ్ళింది. అయితే ఆమె బారాకుతో, ‘ఈ విజయానికి నువ్వు ఘనత పొందవు, ఎందుకంటే యెహోవా ఒక స్త్రీ చేతికి సీసెరాను అప్పగిస్తాడు’ అని చెప్పింది. చివరకు అలాగే జరిగింది.

బారాకు తాబోరు కొండపైనుండి దిగి సీసెరా సైన్యాన్ని ఎదుర్కోవడానికి వెళ్ళాడు. యెహోవా అకస్మాత్తుగా వరద రప్పించినప్పుడు శత్రు సైన్యంలోని అనేకులు మునిగిపోయారు. అప్పుడు సీసెరా రథం దిగి పరుగెత్తి పారిపోయాడు.

కొంతసేపటి తరువాత సీసెరా యాయేలు గుడారం దగ్గరకు వెళ్ళాడు. ఆమె అతనిని లోపలికి ఆహ్వానించి త్రాగడానికి కొంచెం పాలిచ్చింది. అది అతనికి నిద్రమత్తు కలిగేలా చేసింది కాబట్టి అతను వెంటనే గాఢ నిద్రలోకి జారుకున్నాడు. అప్పుడు యాయేలు గుడారపు మేకును తీసుకొని ఆ చెడ్డ వ్యక్తి కణతలో దిగగొట్టింది. తర్వాత బారాకు రాగానే ఆమె చనిపోయిన సీసెరాను ఆయనకు చూపించింది! చూశారా, దెబోరా చెప్పినట్లే జరిగింది.

చివరకు యాబీను రాజు కూడా చంపబడ్డాడు. కొంతకాలంవరకూ ఇశ్రాయేలీయులు మళ్ళీ సమాధానంతో జీవించారు.

న్యాయాధిపతులు 2:14-22; 4:1-24; 5:1-31.

సూర్యుడు అలాగే నిలిచిపోవడం

యెహోషువ వైపు చూడండి. ఆయన, ‘సూర్యుడా, నిలిచిపో!’ అని అంటున్నాడు. అప్పుడు సూర్యుడు అలాగే నిలిచిపోయాడు. రోజంతా ఆకాశం మధ్యలో అలాగే నిలిచిపోయాడు. యెహోవాయే అలా జరిగేలా చేశాడు! అయితే సూర్యుడు ప్రకాశిస్తూనే ఉండాలని యెహోషువ ఎందుకు కోరుకున్నాడో చూద్దాం.

కనాను దేశంలోని ఐదుగురు చెడ్డ రాజులు గిబియోనీయులతో యుద్ధం చేయడం ప్రారంభించినప్పుడు గిబియోనీయులు సహాయం కోరడానికి యెహోషువ దగ్గరకు ఒక వ్యక్తిని పంపించారు. ‘త్వరగా మా దగ్గరకు రండి! మమ్మల్ని రక్షించండి! కొండప్రాంతంలోని రాజులంతా మీ సేవకులమైన మాతో యుద్ధం చేయడానికి వచ్చారు’ అని ఆ వ్యక్తి చెప్పాడు.

వెంటనే యెహోషువ, ఆయన యుద్ధశూరులందరూ వెళ్ళారు. వాళ్ళు రాత్రంతా నడిచి వెళ్ళారు. వాళ్ళు గిబియోనుకు రాగానే ఆ ఐదుగురు రాజుల సైనికులు భయపడి పారిపోవడం ప్రారంభించారు. అప్పుడు యెహోవా ఆకాశం నుండి వడగండ్ల వర్షము కురిసేలా చేశాడు, యెహోషువ యుద్ధశూరుల చేతిలోకంటె వడగండ్ల చేతనే ఎక్కువమంది మరణించారు.

అయితే కొంతసేపటికి సూర్యుడు అస్తమిస్తాడని యెహోషువ గ్రహించాడు. చీకటిపడినప్పుడు ఐదుగురు చెడ్డ రాజుల సైనికుల్లో చాలామంది తప్పించుకుపోయే అవకాశం ఉంది. అందుకే యెహోషువ యెహోవాకు ప్రార్థన చేసి, ‘సూర్యుడా నిలిచిపో!’ అని అన్నాడు. సూర్యుడు అలాగే ప్రకాశిస్తుండగా ఇశ్రాయేలీయులు యుద్ధంలో విజయం సాధించగలిగారు.

దేవుని ప్రజలను ద్వేషించే అనేకమంది చెడ్డరాజులు కనానులో ఉండేవారు. ఆ దేశానికి చెందిన 31 మంది రాజులను జయించడానికి యెహోషువకు, ఆయన సైన్యానికి దాదాపు ఆరు సంవత్సరాలు పట్టింది. ఆ పని పూర్తైన తర్వాత, యెహోషువ ఇంకా స్థలం కావలసిన ఇశ్రాయేలు గోత్రాలకు కనాను దేశము పంచిపెట్టబడేలా చూశాడు.

అనేక సంవత్సరాలు గడిచిన తర్వాత చివరకు 110 సంవత్సరాల వయస్సులో యెహోషువ మరణించాడు. ఆయన, ఆయన స్నేహితులు బ్రతికివున్నంతకాలం ప్రజలు యెహోవాకు విధేయత చూపించారు. కానీ ఆ మంచి మనుష్యులు చనిపోయిన తరువాత ప్రజలు చెడ్డ పనులు చేయడం ప్రారంభించి కష్టాల్లో చిక్కుకున్నారు. ఆ సమయంలోనే వాళ్ళకు నిజంగా దేవుని సహాయం అవసరమయ్యింది.

యెహోషువ 10:6-15; 12:7-24; 14:1-5; న్యాయాధిపతులు 2:8-13.

తెలివైన గిబియోనీయులు

కనానులోని చాలా పట్టణాలు ఇశ్రాయేలీయులతో యుద్ధం చేయడానికి సిద్ధమయ్యాయి. వాళ్ళు తాము జయించగలము అనుకున్నారు. కానీ దగ్గర్లోని గిబియోను పట్టణస్థులు అలా అనుకోలేదు. దేవుడు ఇశ్రాయేలీయులకు సహాయం చేస్తున్నాడని వాళ్ళకు తెలుసు కాబట్టి వాళ్ళు దేవునికి వ్యతిరేకంగా యుద్ధం చేయడానికి ఇష్టపడలేదు. కాబట్టి గిబియోనీయులు ఏమి చేశారో తెలుసా?

వాళ్ళు ఎక్కడో దూరప్రాంతంలో నివసించేవారిలా కనిపించాలని నిర్ణయించుకున్నారు. వాళ్ళలో కొంతమంది చాలా పాతబడిన బట్టలను, అరిగిపోయిన చెప్పులను వేసుకున్నారు. ఎంతో పాతబడిన బస్తాలను తమ గాడిదలపై వేసుకొని, తమతోపాటు కొన్ని ఎండిపోయిన సద్ది రొట్టెలను తీసుకొని వెళ్ళారు. వాళ్ళు యెహోషువ దగ్గరకు వెళ్ళి, ‘మేము మీ గొప్ప దేవుడైన యెహోవా గురించి విని ఎంతో దూరంనుండి వచ్చాము. ఆయన మీకు ఐగుప్తులో చేసిన వాటన్నింటి గురించి మేము విన్నాము. అందుచేత మా పెద్దలు ప్రయాణానికి కొంత ఆహారమును సిద్ధం చేసుకొని వెళ్ళి, “మేము మీ దాసులం. మాతో యుద్ధము చేయమని మాకు ప్రమాణం చేయండి” అని మీకు చెప్పమన్నారు. దూరప్రయాణం మూలంగా మా బట్టలు చినిగిపోయాయని, మా రొట్టెలు సద్దివై ఎండిపోయాయని మీరు చూడవచ్చు’ అని చెప్పారు.

యెహోషువ, ఇతర నాయకులు గిబియోనీయుల మాటలను నమ్మారు. కాబట్టి వాళ్ళతో యుద్ధం చేయము అని వాళ్ళకు ప్రమాణం చేశారు. కానీ మూడు రోజుల తర్వాత గిబియోనీయులు నిజానికి ఆ దగ్గర్లోనే నివసిస్తున్నారని వాళ్ళకు తెలిసింది.

‘మీరు దూరప్రాంతంనుండి వచ్చామని ఎందుకు చెప్పారు?’ అని యెహోషువ వాళ్ళను అడిగాడు.

అందుకు గిబియోనీయులు, ‘మీ దేవుడైన యెహోవా ఈ కనాను దేశమంతటిని మీకు ఇస్తానని వాగ్దానం చేశాడని మేము విన్నాము. కాబట్టి మీరు మమ్మల్ని చంపేస్తారని మేము భయపడ్డాము. అందుకే మేము అలా చెప్పాము’ అని సమాధానమిచ్చారు. అయితే ఇశ్రాయేలీయులు తమ ప్రమాణాన్ని నిలుపుకొని గిబియోనీయులను చంపలేదు. దానికి బదులు వాళ్ళు గిబియోనీయులను తమ సేవకులుగా చేసుకున్నారు.

గిబియోనీయులు ఇశ్రాయేలీయులతో సమాధానపడినందుకు యెరూషలేము రాజుకు చాలా కోపం వచ్చింది. కాబట్టి ఆయన వేరే నలుగురు రాజులను, ‘గిబియోనుతో యుద్ధం చేసేందుకు నాకు సహాయం చేయండి’ అని అడిగాడు. ఆ ఐదుగురు రాజులు కలిసి అలానే యుద్ధం చేశారు. ఇశ్రాయేలీయులతో సమాధానపడినందుకే ఆ రాజులు యుద్ధం చేయడానికి వచ్చారు కదా, మరి గిబియోనీయులు ఇశ్రాయేలుతో సమాధానపడి జ్ఞానయుక్తమైన పనే చేశారా? మనం దాని గురించి చూద్దాం.

యెహోషువ 9:1-27; 10:1-5.

ఇశ్రాయేలులో దొంగ

ఈ వ్యక్తి తన గుడారంలో ఏమి పాతిపెడుతున్నాడో చూడండి! ఒక చక్కని వస్త్రము, బంగారు కమ్మి, కొన్ని వెండి ముక్కలు దాచిపెడుతున్నాడు. అతను వాటిని యెరికోనుండి తీసుకున్నాడు. నిజానికి యెరికోలోని వస్తువులను ఏమి చెయ్యాలి? మీకు జ్ఞాపకం ఉందా?

వాటిని నాశనం చెయ్యాలి. బంగారము, వెండిని మాత్రం యెహోవా గుడారపు ధనాగారానికి ఇవ్వాలి. కానీ ఈ వ్యక్తులు యెహోవాకు అవిధేయత చూపించారు. వాళ్ళు దేవుని సొత్తును దొంగిలించారు. ఆ వ్యక్తి పేరు ఆకాను. అతనితోపాటు ఉన్నవారు అతని కుటుంబ సభ్యులు. ఆ తర్వాత ఏమి జరిగిందో చూద్దాం.

ఆకాను వాటిని దొంగిలించిన తర్వాత, యెహోషువ కొంతమందిని హాయి పట్టణముతో యుద్ధం చేయడానికి పంపించాడు. కానీ వాళ్ళు యుద్ధంలో ఓడిపోయారు. కొందరు చంపబడ్డారు, మిగిలినవారు పారిపోయి వచ్చేశారు. యెహోషువ చాలా బాధపడ్డాడు. ఆయన తన ముఖాన్ని నేలకు వంచి, ‘ఎందుకు ఇలా జరగనిచ్చావు?’ అని యెహోవాకు ప్రార్థించాడు.

అందుకు యెహోవా, ‘ఇశ్రాయేలీయులు నా ఎదుట పాపము చేశారు. నాశనం చేయవలసిన వాటిని, యెహోవా గుడారానికి ఇవ్వవలసిన వాటిని వాళ్ళు ఉంచుకున్నారు. ఒక చక్కని వస్త్రాన్ని దొంగిలించి దాన్ని రహస్యంగా దాచిపెట్టారు. నువ్వు వాటిని, వాటిని తీసుకున్న వ్యక్తిని నాశనం చేసేంతవరకు నేను మిమ్మల్ని ఆశీర్వదించను’ అని సమాధానమిచ్చాడు. ఆ చెడ్డ వ్యక్తి ఎవరో నేను చూపిస్తానని కూడా యెహోవా యెహోషువతో చెప్పాడు.

కాబట్టి యెహోషువ ప్రజలందరిని సమకూర్చినప్పుడు యెహోవా చెడ్డవాడైన ఆకానును వేరుచేశాడు. అప్పుడు ఆకాను, ‘నేను పాపము చేశాను. ఒక చక్కని వస్త్రాన్ని, బంగారు కమ్మిని, వెండి ముక్కలను నేను చూశాను. అవి నాకు ఎంతో నచ్చాయి కాబట్టి వాటిని తీసుకున్నాను. నేను వాటిని నా గుడారం లోపల పాతిపెట్టాను’ అని చెప్పాడు.

ఆ వస్తువులు యెహోషువ దగ్గరకు తీసుకురాబడినప్పుడు ఆయన ఆకానుతో, ‘నువ్వు మమ్మల్ని ఎందుకు కష్టపెట్టావు? ఇప్పుడు యెహోవా నిన్ను కష్టపెడతాడు!’ అన్నాడు. అప్పుడు ప్రజలంతా ఆకానును, అతని కుటుంబాన్ని రాళ్ళతో కొట్టి చంపారు. మనవి కాని వస్తువులను మనం ఎన్నడూ తీసుకోకూడదని ఇది చూపడం లేదా?

తర్వాత ఇశ్రాయేలీయులు మళ్ళీ హాయితో యుద్ధం చేశారు. ఈసారి యెహోవా తన ప్రజలకు సహాయం చెశాడు, వాళ్ళు యుద్ధంలో జయించారు.

యెహోషువ 7:1-26; 8:1-29.

యెరికో గోడలు

యెరికో గోడలు అలా ఎందుకు కూలిపోతున్నాయి? ఏదో ఒక పెద్ద బాంబు వాటిని కూల్చేస్తున్నట్లు కనిపిస్తోంది. కానీ ఆ రోజుల్లో బాంబులు లేవు; కనీసం తుపాకులైనా లేవు. అది యెహోవా చేసిన మరో అద్భుత కార్యం! అసలు అది ఎలా జరిగిందో చూద్దాం.

యెహోవా యెహోషువతో ఇలా చెప్పాడు: ‘నువ్వు, నీతోపాటు నీ యుద్ధశూరులు పట్టణం చుట్టూ తిరగాలి. రోజుకు ఒకసారి చొప్పున ఆరు రోజులు తిరగాలి. మీతోపాటు నిబంధన మందసాన్ని తీసుకు వెళ్ళాలి. ఏడుగురు యాజకులు దాని ముందు నడుస్తూ తమ బూరలు ఊదాలి.

‘ఏడవ రోజున పట్టణం చుట్టూ ఏడుసార్లు తిరగాలి. తర్వాత బూరలు ఊదుతూ ప్రతి ఒక్కరు యుద్ధ కేకలు వేయాలి. అప్పుడు గోడలు కూలిపోతాయి!’

యెహోషువ, ప్రజలు యెహోవా చెప్పినట్లు చేశారు. వాళ్ళు పట్టణం చూట్టూ తిరిగేటప్పుడు నిశ్శబ్దంగా నడిచారు. ఎవ్వరూ ఏమీ మాట్లాడలేదు. కేవలం బూరల శబ్దం, వాళ్ళ అడుగుల చప్పుడు మాత్రమే వినిపించింది. యెరికోలోని దేవుని ప్రజల శత్రువులు తప్పకుండా భయపడి ఉంటారు. ఒక కిటికీలోనుండి వ్రేలాడుతున్న ఎర్రని తాడు మీకు కనిపించిందా? ఆ కిటికీ ఎవరిది? అవును, రాహాబు ఆ ఇద్దరు వేగులవాళ్ళు చెప్పినట్లు చేసింది. ఆమె కుటుంబమంతా ఆమెతోపాటు ఇంట్లోనే ఉండి ఎదురు చూశారు.

చివరకు ఏడవ రోజున పట్టణం చుట్టూ ఏడుసార్లు తిరిగిన తర్వాత, యాజకులు బూరలు ఊదారు, యుద్ధశూరులు కేకలు వేశారు, గోడలు కూలిపోయాయి. అప్పుడు యెహోషువ, ‘పట్టణంలోని ప్రతి ఒక్కరిని చంపేసి, పట్టణాన్ని కాల్చివేయండి. పూర్తిగా కాల్చివేయండి. వెండి, బంగారం, ఇత్తడి, ఇనుమును మాత్రం మిగిల్చి యెహోవా గుడారపు ధనాగారములో ఉంచండి’ అని చెప్పాడు.

ఆ ఇద్దరు వేగులవాళ్ళతో యెహోషువ, ‘మీరు రాహాబు ఇంటికి వెళ్ళి, ఆమెను ఆమె ఇంటివారిని బయటకు తీసుకొని రండి’ అని చెప్పాడు. వేగులవాళ్ళు వాగ్దానం చేసినట్లు రాహాబు, ఆమె కుటుంబం రక్షించబడింది.

యెహోషువ 6:1-25.

యొర్దాను నది దాటడం

చూడండి! ఇశ్రాయేలీయులు యొర్దాను నది దాటుతున్నారు! మరి నదిలోని నీళ్ళు ఏవి? సంవత్సరంలోని ఆ సమయంలో వర్షాలు బాగా పడతాయి కాబట్టి అప్పటివరకూ నది పొంగి పొర్లింది. అయితే కొద్ది నిమిషాల్లోనే నీళ్ళు లేకుండా పోయాయి! ఇశ్రాయేలీయులు ఎర్ర సముద్రంలో నడిచినట్లే ఎండిన నేలపై నడిచి వెళ్తున్నారు! నీళ్ళన్ని ఎక్కడికి పోయాయి? చూద్దాం.

ఇశ్రాయేలీయులు యొర్దాను నది దాటే సమయం వచ్చింది. అప్పుడు ‘యాజకులు నిబంధన మందసాన్ని తీసుకొని ముందుగా నడవాలి. వాళ్ళు తమ పాదాలను యొర్దాను నది నీళ్ళలో పెట్టిన వెంటనే నీళ్ళ ప్రవాహం ఆగిపోతుంది’ అని ప్రజలకు చెప్పమని యెహోవా యెహోషువకు చెప్పాడు.

కాబట్టి యాజకులు నిబంధన మందసాన్ని ఎత్తుకొని ప్రజలకు ముందుగా నడిచారు. యొర్దాను దగ్గరకు వచ్చినప్పుడు యాజకులు నీటిలో అడుగు పెట్టారు. ఆ నది ఎంతో వేగంగా, లోతుగా ప్రవహిస్తుంది. అయితే వాళ్ళ పాదాలు నీళ్ళను తాకగానే నీళ్ళ ప్రవాహం ఆగిపోయింది! అద్భుతం! ప్రవహిస్తున్న నీళ్ళను యెహోవా నిలిపివేశాడు. వెంటనే నదిలో నీళ్ళు ఇంకిపోయాయి!

నిబంధన మందసాన్ని మోసుకెళ్తున్న యాజకులు ఎండిన నది మధ్య భాగంలోకి వెళ్ళారు. వాళ్ళు చిత్రంలో మీకు కనిపిస్తున్నారా? వాళ్ళు అక్కడ నిలబడి ఉండగా ఇశ్రాయేలీయులంతా ఎండిన యొర్దాను నది నేలపై నడిచి వెళ్ళారు!

అందరూ దాటిపోయిన తర్వాత బలంగల 12 మంది వ్యక్తులకు యెహోవా యెహోషువతో ఇలా చెప్పించాడు: ‘యాజకులు నిబంధన మందసమును ఎత్తుకొని నిలబడిన చోటికి వెళ్ళి అక్కడనుండి 12 రాళ్ళను తీసుకొని వచ్చి ఈ రాత్రి మీరు బసచేసే స్థలంలో నిలబెట్టండి. భవిష్యత్తులో మీ కుమారులు ఈ రాళ్ళు ఏమిటని అడిగినప్పుడు, యెహోవా నిబంధన మందసము యొర్దానును దాటినప్పుడు నీళ్ళు నిలిచిపోయాయని మీరు చెప్పాలి. ఈ రాళ్ళు మీకు ఈ అద్భుతాన్ని గుర్తు చేస్తాయి!’ నది అడుగు భాగాన యాజకులు నిలబడిన చోట కూడా యెహోషువ 12 రాళ్ళను నిలబెట్టించాడు.

చివరకు యెహోషువ, ‘యొర్దానును దాటండి’ అని నిబంధన మందసమును మోస్తున్న యాజకులతో చెప్పాడు. వాళ్ళు అలా దాటిన వెంటనే నది మళ్ళీ ప్రవహించడం ప్రారంభించింది.

యెహోషువ 3:1-17; 4:1-18.